貓貓MeowHome

因為上星期有個朋友生日, 佢一直都用緊我整既手工皂, 所以決定試下整cup cakes送比佢. 今次過程比上次整玫瑰花蛋糕皂還要難, 因要分開三日整.

第一晚要打好皂液入啫喱杯做糕底, 再要將皂液分色(6種不同顏色)同入小小模做裝飾.

第二日就要將不同顏色皂皂搓成大小不一的波波, 呢個過程係最複雜, 足足用左4個鐘頭先完成

第三晚係最緊要, 因為要打另一底皂液, 然後當忌廉唧花, 因為我唔識整蛋糕, 所以我係唔識唧花, 如果稍有差池就前工盡費. 所以我之前睇左好多整蛋糕網址, 睇下人地點唧花, 從中偷師.

因為個texture要似忌廉狀態, 所以今次要打到over trace, 出動了小幫手慢慢試, 再倒入忌廉袋唧花, 過程一步一驚心, 不能出錯.

唧完忌廉後, 再放入小波波裝飾, 完成.

我用了個透明蛋糕盒放入, 朋友收到後驚訝表情, 真的嚇了一跳.

雖然唔係好完美, 唧花唧到一忽忽, 唔得順暢, 始終都係第一次嘗試, 但係滿足感比上次個玫瑰蛋糕手工皂還要大, 心血心機真的不小, 好倦.......

材料:

蛋糕底 (2層分色 - 朱古力色 + 白色) : 橄欖油, 椰子油, 棕櫚油, 乳木果脂, 芥花籽油, 白油, 朱古力粉

忌廉唧花 : 橄欖油, 椰子油, 棕櫚油, 乳木果脂, 大豆油, 白油, 薄荷精華油

小波波 : 橄欖油, 椰子油, 棕櫚油, 乳木果脂, 大豆油, 白油, 皂用珠光粉, 皂用色液

p.s.因為考慮到如果用天然花草粉, 時間久了, 顏色會漸漸改變及暗淡, 所以決定用珠花粉及皂用色液來溝色, 出來效果實在漂亮, 尢其是粉紅色, 真係好靚.

多謝老公連續三日係隔離幫手, 冇佢都攪唔掂!!