沙律生育記－貓貓MeowHome

係沙律懷孕時候, 我地同佢講: [ 喂...你唔好係我結婚o個日12/2 生bb, 我地照顧唔到你o架 ], 因為我地計算到佢應該係我地結婚o個幾日生....如果真係, 都唔知點算...

終於完成了婚禮, 我地亦都鬆下一口氣, 因為我地冇即刻去honeymoon關係, 所以我地第二日只係屋企休息. 到了晚上 11:00左右, 沙律似作動準備生bb, 因為我地冇接生經驗, 所以即刻call兩個朋友Kin and Sze上來幫忙, 因為佢地係做寵物護理.

我地之前準備左好多紙皮箱比佢生, 點知佢好驚同冇生bb經驗, 要躲係梳化底唔肯出來生, 我地四個大人唯有爬係地下幫佢. 終於等到半夜 3:50am第一隻bb出世, 因為佢懷孕時候太好營養, bb好大隻, 可能係胎中冇得轉身, 所以腳出先, 生得好辛苦好危險, 又唔可以太大力扯佢出來, 怕整斷頸, 又唔可以生的太耐, 因為bb會窒息死, 真係好驚險.

莎莎女 - 我親自剪臍帶, 剛出生抹乾身就已經咁大隻

跟住繼續等, 到了4:35am, 第二隻出世

嘉嘉女 - 頭上有少少白毛, 出世最大隻

沙律已經好倦了, 我地比左d乾糧佢食...繼續等, 一個鐘頭後5: 30am第三隻出世

Mocha仔 - 佢出世係最渾圓, 好得意...

已經生了三隻, 沙律倦到睡著了, 我地四個大人唯有不眠不休繼續等, 已經天光了.

到了早上8:20am, 我地打醒十二分精神, 沙律又再準備生了, 第四隻bb出世, 剛出生時呼吸好微弱, 朋友即刻幫佢急救, 等佢鼻子d 肺水出來先冇事

Coffee女 - 出世時最弱, 最細小.

摸下沙律個肚仔, 應該未生完, 繼續等.......................唔對路, 已經等到11:00am都未有動靜, 朋友話驚太耐bb有事, 我地即刻打比相熟寵物醫生, 將情況話比佢, 醫生唔建議我地帶佢去診所生, 怕沙律會仲驚唔肯生, 佢話有d case 係會相隔 8-9個鐘先再生, 不過亦有可能bb已經胎死腹中.

吓...我地好驚, 唔知點算....到了 3:00pm, 我地都已經打定輸數, 我地同自己講就算 bb 已經有事, 都要等佢排返個死胎出來, 因怕沙律有危險, 唯有繼續等...其實我地四個已經好好倦.

等到 5:50pm, 有動靜, 沙律準備生了, 我同老公都好緊張. 可能今次相隔了接近10個鐘頭, 個bb可以轉身出世, 所以bb出世時係頭出先, 當我地見到佢 ' 猛 " 大個口仔時, 我地四個開心到唔知點形容, 佢好健康不過就頑皮了, 要我地等左佢10個鐘頭, 仲有佢係唯一一隻捲毛貓, 似足佢老豆 - Cookie...

Mellow 女 - 胎中唯一一隻羊毛貓, d毛都幾捲...

我地以為沙律已經生完, 點知朋友話仲有一隻係肚裡面, 到了夜晚 7:35pm, 最後一隻 bb出世, 不過佢都係腳出先, 個頭一路都出唔到, 朋友Kin話太大隻, 沙律生唔到, 等左好耐先出到黎, 但已經冇呼吸了, Kin 冇放棄, 幫佢急救了超過30分鐘, 希望能救番佢, 不過都係冇用了, 我勸他放棄吧, 已經盡力了, 不用難過. 能夠見到沙律平安生了五隻貓bb, 已經好足夠, 實在太多謝兩位朋友捱通宵幫忙.

由 13/2 晚上11:30pm 作動開始, 沙律足足生了18個鐘, 5隻 bb 係 14/2 情人節出世, 係佢比我地最好最好結婚禮物....五福臨門

辛苦你了...沙律

晚上, 當老公同佢影相時, 沙律突然笑了...好放鬆地笑了